HASI DIRA ILUSTRATZAILEAK NORBERAREN MEMORIAN ARAKATZEN

12 dira aurtengo MarraziOak-en memoriaren gaia lantzen hasi diren ilustratzaileak: Unai Gonzalez, Ainara Altuna, Koldo Balenciaga, Andrea Costas, Gontzal Gutierrez, Ainara Azpiazu (Axpi), Usue Egia, Concetta Probanza, Anaitz Igoa, Leire Kareaga, Eneritz Ibarra eta Irati Merino.  Ignasi Blanch ilustratzaileak eta Harkaitz Cano idazleak, lehendabiziko aurkezpenak bideratu ostean, aurtengo jardunaldien programa eta mamia azaldu dizkiete parte-hartzaileei. Eta, gero, lanean jarri dituzte parte-hartzaileak:

Bakoitzak euren bizitzaren memoriaren ilustrazio bat egin behar izan du. Izan zitekeen egoera bat, pasarte bat, une jakin bat... 12ek ilustrazioa osatuta zutenean, ondoko lagunari pasa behar izan diote. Eta hark interpretatu behar izan du ilustrazioak zer kontatzen zuen. Ondoren, kontrastatu dute egileak ilustratu nahi zuenarekin.


Atseden labur baten ostean, Tod Browning-en “Freaks” filma (1932an estreinatu eta zinemaren historian gehien zentsuratu den pelikula) ikusteari ekin diote.

Memoriaren liporelloak
Aurten ere, orain bi urte "Errauskine"ren istorioak irudikatzeko erabili zuten formatu bera gauzatuko dute ilustratzaileek. Liporello bana osatu beharko dute euren memoria intimoa irudikatuz. Arratsalderoko saioak eskainiko dizkiote zeregin horri. 

Gaur hasi eta datorren asteartera arte (irailak 18ra arte) lan handia egin beharko dute aurtengo MarraziOak-en parte hartzen ari diren 12 ilustratzaileek. Euren memorietan murgildu eta, bertan, ilustratuko duten pasarte edo istorioa hautatu, hausnartu eta ilustrazio bidez kontatzen asmatzeko.  

MarraziOak X Topaketen deialdia zabalik

2018ko irailaren 13tik 18ra burutuko dugun MarraziOak Ilustratzaile berrien Topaketen X. Edizioko deialdia zabalik da.

Harkaitz Cano eta Ignasi Blanch izango dira aurten irakasleak eta eskainiko duten formazioa “MEMORIAREN MARRETAN BARRENA. Norbere espaziotik, norbere gorputzetik” goiburupean dator. 

Komikigunean (Errege-Erregina Katolikoen Kalea, 16) burutuko dira aurten ere MarraziOak jardunaldiak, Gipuzkoako Foru Aldundiaren laguntzari esker.

Guztira 12 ilustratzailek izango dute MarraziOak-eko 37 formazio orduak jasotzeko aukera.  Parte hartu nahi duenak, dokumentazio arruntaz gain, 5 ilustrazio bidali beharko ditu: argitaratuak edo ez, bere ustetan bere lana hobekien jaso edo biltzen duten 5 irudiak, wetransfer bidez, administrazioa@galtzagorri.eus –era.

MarraziOak X-en parte hartzeko hautagaitzak bidaltzeko azken eguna uztailaren 6a izango da.

Laster zabalduko dugu MarraziOak X edizioaren deialdia

Aurtengo topaketak Harkaitz Canok eta Ignasi Blanch-ek gidatuko dituzte. "MEMORIAREN MARRETAN BARRENA. Norbere espaziotik, norbere gorputzetik" lelopean, bost eguneko tailerra eskainiko dute, irailaren 13tik 18ra, Donostian, Komikigunean.

Adi! Laster zabalduko dugu deialdia!

 

ALBUM BAT EGITEN HASI DIRA

Atzoko argazkiak dira beheko hauek. MarraziOak IX-n lanean segitzen zuten ilustratzaileek, tailer honen bigarren egunean. Gustavo Puertak eta Elena Odriozolak lehenengo egunean proposatutako txikitako eszenarekin lanean jarraituz, album txiki bana egiten hasi ziren. 

Hona irudi batzuk:

 

                                             

                          

                          

TXIKITAKO OROITZAPEN ETA OBJEKTUETATIK TIRAKA HASI DIRA LANEAN 11 ILUSTRATZAILEAK MARRAZiOAK-EN

Txikitako objektu bana aukeratu behar izan dute MarraziOak IX. Edizioan parte hartzen ari  diren hamaika ilustratzaileek. Objektu horretan oinarrituta egin du norberak bere buruaren aurkezpena aurtengo ilustratzaileen Topaketen lehenengo egunean. Gero, lanari ekin diote, Gustavo Puerta literatura eta arte adituaren eta Elena Odriozola ilustratzailearen gidaritzapean.

Lehenengo ariketa: txikitako eszena bat aukeratzeko eskatu diete irakasleek. Edo ume batek parte hartu dezakeen eszena bat. Eszena horretako akzioan ageri diren objektu guztiak irudikatu behar izan dituzte silueta bidez. Ondoren, hori “imaginario ilustratu” bihurtu behar dute, detaile gehiagorekin ilustratuz.

Haur txikientzako liburu baten proiektua garatzeko lehenengo irakasgaia lortzeko balioko du lehendabiziko ariketa honek. Lanean hasi besterik ez dira egin Olaia Martinez, Saioa Burutaran, Maite Gurrutxaga, Anaitz Igoa, Ibon Markaida, Ainara Altuna, Ainara Azpiazu (Axpi), Helena Azkarragaurizar, Izar Etxeberria, Yolanda Yubero eta Iñaki Martiarena (Mattin) ilustratzaileak. Gaurtik ostiralera arte, goiz eta arratsaldez (zenbaitek gauez ere egiten du lan ondoren etxean) haur txikientzako beste era bateko liburuak sortzeko erronkari aurre egingo diote ilustratzaile hauek Puerta eta Odriozolaren zuzendaritzapean.

2009an antolatu zituen lehenengo aldiz Galtzagorri Haur eta Gazte Literatura Elkarteak MarraziOak Topaketak. Istorio bat ilustratzeko bide ezberdinak arakatzen dira 2009tik urtero antolatu diren Ilustrazio Topaketa hauetan.

Topaketa hauen helburu zehatzak, besteak beste, hauek dira:

.Ilustratzaileek lanerako baliagarria duten formazioa eskuratzea

.Lan dinamika aberasgarri bat eskaintzea: ilustratzaileei elkarrekin egoteko eta lan egiteko gunea, denbora eta egitaraua bideratuz, euren ideiak eta proiektuak elkar trukatu ditzaten

.Genero, teknika, gai eta egitura berriekin esperimentatzea

.Sormenaren sustapena: ilustrazioaren eta gure ilustratzaileen “harrobiaren” akuilu ere izan nahi dute

Edizioz edizio, helburu hauek betetzeko xedez, gai eta formatu ezberdinak landu dira, beti ere ilustrazioari eta album ilustratuari loturik. Hala nola, album mutuak, autoedizioa, ilusionismoa, aldareen narrazio egiturak, animazioa, mapak, laminak, emakumeen errepresentazioa… aurten, haur txikienentzako beste era bateko liburuak sortzeko bideak arakatuko dituzte. Zeregin honetarako hautatu dituzte Puertak eta Odriozolak lehen aipatutako 11 ilustratzaileak.

Hamaika lagun hautatu dituzte MarraziOak IX Topaketetarako

MarraziOak IX topaketetan hamaika ilustratzailek hartuko dute parte aurten. Elena Odriozolak eta Gustavo Puertak gidatuko dituzte aurtengo topaketak eta haiek izan dira aurkeztutako ilustratzaileak hautatu dituztenak bakoitzaren lanak aztertu ondoren.

Hauek izan dira hautatuak: Olaia Martinez, Saioa Burutaran, Maite Gurrutxaga, Anaitz Igoa, Ibon Markaida, Ainara Altuna, Ainara Azpiazu (Axpi), Helena Azkarragaurizar, Izar Etxeberria, Yolanda Yubero eta Iñaki Martiarena (Mattin).

"Kosk egiteko, botatzeko, lardaskatzeko eta are irakurriak izateko moduko liburuak egin" lelopean egingo dira aurtengo Ilustratzaileen Topaketak, irailaren 11tik 15era, bost egunez, Donostiako Komikigunean (Errege-Erregina Katolikoen Kalea, 16), Gipuzkoako Foru Aldundiaren laguntzari esker.

Haur txikientzako liburuak sortzearen erronkari helduko diote beraz aurtengo MarraziOak-en: bere konplexutasunagatik, zabaltzen dituen esperimentatzeko aukerengatik eta dakartzan komunikazio eskakizunengatik Haur Literaturaren baitan nabarmentzen den alorren bat baldin bada, hau, ezbairik gabe, haur txikientzako liburuena da.

Liburu hauek ordea, ez dute liburu-albumek izaten duten ospea. Literaturatik baino jostailuetatik gertuago dagoen merkantziatzat hartzen baitira. Aurreiritzi hori oso errotua dago, eta merkatuan nagusi den eskaintza kaskarrak ez du gehiegi laguntzen.

Baina, posible al da haur txikientzako beste era bateko liburuak sortzea?

Zertarako egin liburuak oraindik irakurtzen ez dakitenentzat?

Erronka horri aurre egin nahian, formazioa eskainiko zaie MarraziOak IXn parte hartzeko aukeratuak izan diren 11 ilustratzaileei. 5 egunez, 7 ordutako saioak eskainiko dira. Guztira, 35 orduko tailer praktikoa izango da.